ختى الفاضلة ...
أكيد أنت بتفكرى مع نفسك يا ترى أنا بيتى ناقصة إيه ؟ و ربما تكتشفين أن البيت فعلاً ناقصة حاجات كتير ، يمكن فلوس أو اثاثات أو أجهزة منزلية أو تجديدات أو ...
و أنا هأصلى معاكِ علشان ربنا يكمل عندك كل الاحتياجات الضرورية .
بس النهاردة نفسي أقولك فى ودنك يمكن بيتك محتاج أكتر للمحبة – للحكمة – للطاعة .....
فكرتى أنك تشوفى الحاجات دى ، و تصلى علشانها ،علشان ربنا يرتبها و يوفرها فى بيتك ، و يكون بيتك فعلا البيت المسيحى الحقيقى .
الحكيم سليمان قال لنا كلام مهم خالص تعالى نتعلم منه حاجة مهمة لبيوتنا
"الحكمة بنت بيتها ، نحتت أعمدتها السبعة ؟" ( أمثال 9 : 1 )
وكمان قال " حكمة المرأة تبنى بيتها و الحماقة تهدمه بيدها ؟" ( أمثال 13 : 1 )
عارفة إيه هى الحكمة اللى بيتكلم عنها سليمان " رأس الحكمة مخافة الرب " و كمان الحكمة هى الحيدان عن الشر ، يعنى نتقى الرب و نقدره فى السر و العلن .
تحبى تعرفى الأعمدة السبعة اللى لازم يكونوا فى بيتك ؟ يا ريت تصلى علشان الأعمدة السبعة يكونوا موجودين علشان البيت يكون قوى و متين "فنزل المطر وجاءت الأنهار وهبت الرياح ووقعت على ذلك البيت فلم يسقط.لأنه كان مؤسساً على الصخر . ( مت 7 : 25 )
1- العمود الأول العبادة
2- العمود الثانى المحبة
3-العمود الثالث الخضوع
4- العمود الرابع الطاعة
5- العمود الخامس الشركة
6- العمود السادس الحكمة
7- العمود السابع الاعتزال
و النهاردة نفسى أكلمك عن عمود واحد من الأعمدة السبعة اللى فاتت و هو عمود الحكمة اللى بيوتنا محتاجة ليه قوى و خصوصاً الأيام دى بالذات .
و أنتى عرفتى إيه هى الحكمة ؟ بس يمكن بتسألى أجيبها منين أقولك " من تعوزه حكمة فليطلب من الله الذى يعطى الجميع بسخاء و لا يعير فسيعطى له ( يع 1 : 5 )
أكيد نفسك تكونى حكيمة فى قرارتك و بيتك و عملك أطلبى من ربنا و هو يقدر يبعتلك حكمة نازلة من فوق علشان زماننا ده عايز حكمة من فوق . و من هو حكيم و عالم فلير أعماله بالتصرف الحسن فى وداعة الحكمة . ( يع 3 : 13 )
و أحب أقولك أنك محتاجة الحكمة فى معاملتك مع زوجك – مع أولادك – فى إدارة شئون بيتك .
1- محتاجة لحكمة مع زوجك : و أحب أنبهك لحاجة مهمة أنت مش منافسة له لكنك معينه نظيرة و الزوجة الحكيمة هى اللى تساعد زوجها ، تشجعه فى أزماته ، و تحتمله فى ضعفاتة ، أيدك تسنده و ترفعه ، و كلماتك تنشطه و تقويه ، لا تستنفزى طاقته ، افهميه و احترميه و كونى له عوناً و سندأ .
2- محتاجة لحكمة مع أولادك : تُعرف المرأة الفاضلة فى (أمثال 31 : 26 ، 27 ) بأنها" تفتح فمها بالحكمة و تراقب طرق أهل بيتها " أنتى عارفة يعنى إيه تراقب طرق أهل بيتها هى حكيمة تميزهم و تعرف ما فى دواخلهم بدون أن يعبروا عنه فهذا حزين و ذاك ضعفت صحته الروحية و تلك الفتاة كلامها و تصرفتها صارت غرببة و خروجها كتر و زاد .
عايزة أقولك أوعى تتجسسى عليهم بس ينفع أنك تاخدى مشاكلهم و أمراضهم المتنوعه معاكى لمحضر ربنا و هناك تكلمى مع ربنا عن زوجك و أولادك و هتفرحى لما تشوفى ربنا بيغير فى حياة أهل بيتك و ساعتها أولادك سيطوبونك و زوجك يمدحك فى وسط الناس .
3- كونى حكيمة فى قرارات بيتك : صلى علشان بيتك و خصوصاً علشان القرارات المصيرية اللى بنحتاج نأخدها فى البيت زى نوع العمل و مكان السكن و الهجرة و قرارات الأولاد كلها محتاجة حكمتك و مشورتك الصحيحة.
ربنا يساعدك و يبنى بيتك بالحكمة و افتكري كويس ان زمان امرأة حكيمة منعت عن بيتها و زوجها الأحمق نابال مذبحة كبيرة كاد يسقط فيها دواد النبى .( 1صم 26 )
ربنا معاكى و يعطيك حكمة و ينور ذهنك بنور كلمته المقدسة
و لتكن صلاتك دائماً لربنا :
" ارسل نورك وحقك هما يهديانني وياتيان بي الى جبل قدسك والى مساكنك . " ( مز 43 : 3 )