زواج مع ايقاف التنفيذ

أنا زوجة مسيحية عمري 30 سنة ، وزوجي يبلغ 44 عام. متزوجة من سنة ونص تقريبا
زواجنا زواج تقليدي، (صالونات) ، تم التعارف عن طريق اصدقاء لوالدتي في العمل. حيث انهم على صداقة به. وشكروا فيه جدا - انسان هادي، مش عصبي ، صاحب عمل مناسب ، ملتزم وليس لة تجارب سابقة واعتقد انه اختارني لاني اجتماعية وحسنة المظهر وأيضاً أعمل .

(وبعد سنة خطوبة) تم الزواج وبعد اسبوع العسل ( وفي الحقيقة كنت غير سعيدة على الاطلاق اثناء العلاقة الزوجية حيث انه اناني جدا ومش بيهتم اني اكون مبسوطة او سعيدة ولا يشعر بيا على الاطلاق .ومع هذا لو اقصر اطلاقا في وجباتي كزوجة في أي شئ يخصة أو يخص المنزل.

• (وبعد اسبوع العسل) بعد ان رجعنا الى منزلنا ومع مرور الايام بدأت الاحظ انة بيطلب كتير ان احنا ننزل لعائلاتنا ( بمعني ان احنا ننزل نعد شوية كل واحد في منزل عائلتة) منكملش في شقتنا 4 أو 5 أيام على الاكثر ويطلب اني أنزل بيت اهلي حتى لو غصب عني.

على الرغم اني طلبت منة اكثر من مرة ان احنا نكون مع بعض عند اهلة أو عند اهلي ولكنة كل مرة يقولي خليها مرة تانية. وممكن توصل المدة الى اكثر من 10 ايام لا يتصل بي فيها وانا اللي لازم اتصل علشان اطلب نرجع البيت. وفضلنا على هذا الحال فترة الـ 3 شهور.

• المشكلة بدأت بعد الجواز (بثلاثة اشهر) بالضبط عندما بدأ زوجي يسأل عن تأخر الحمل!!

• وقرر ان احنا سوف نذهب لاستشارة طبيب متخصص ... في البداية اتناقشت معاه ان احنا بقالنا 3 شهور فقط على الجواز لسة شوية علشان نفكر في موضوع الدكتور دا وقلت انا مش معترضة على الذهاب لطبيب (على المبدأ) ولكن اعتراضي على المدة. ولكنه أصر وحجز عند دكتور بمعرفة اختة واخبرني فقط بميعاد الحجز.

الطبيب الأول بعد الكشف، قال ( يوجد ورم ليفي خارج الرحم) واتكلم معانا شوية وطلبنا منة توضيح الصورة ،،، فقال كلام صعب جدا
قال: ان الوضح خطير و ان الرحم هيتشال، لازم عملية فورا وتكتبلي تعهد على حياتها لانة من الاحتمال ان تواجهني متاعب اثناء العملية نظرا لخطورتها.
في الحقيقة الكلام كان صعب جدا علينا خرجنا في حالة صدمة ، انا في حالة انهيار ودموع هستيري الي ان ذهبنا الي منزلنا.
• ومن وقتها كلام صعب واهانات وتجريح وعنف في التعامل. وكلام ان احنا كنا عارفين موضوع الورم الليفي – احنا ( انا وعائلتي) وخبينا عليه، وان هو اتغش واتنصب عليه مني انا وعائلتي. وان الورم الليفي دا مش بيجي لبنات.

• كلام كتير جارح جدا ومهين منه ومن عائلتة ( مثلا اني مش لازماه وان الجوازة دي مش لازماه ووالدتة قالت ان ابني في حضني واحنا مش عايزنها وهنطلقها.
• على الرغم ان والدتي جاءت لزيارتنا في اليوم التالي للدكتورلاني طبعا اتصلت بيها وحكيت لها اللي قالوا الدكتور، ومساءا وماما عندي وهو رجع من عند ماماتة وجد ماما عندنا في البيت لم ينطق معها بكلمة واحدة ولكنة واجهني بكلام مامته بعد نزول ماما.

• وبعد 3 أيام من زيارة الدكتور أصر ان ننزل صباحا لبيت عائلتنا واخد الدهب بتاعي كلة بالعنف ( ذهبي الخاص بي قبل الزواج + الشبكة) وشالة عند ماماتة ومن يومها منعني من دخول الشقة الى الأن ).

• وقام بتغير كالون الشقة بعدها بكام يوم – لاني ذهبت لأخذ بعض الملابس لي من الشقة نظرا لاني أعمل وفي احتياج لملابس لاتمكن من الذهاب للعمل- حاولت افتح الشقة لكني فشلت وعرفت ان الكالون اتغير لان كمان اختة في مكالمة لاحقة اكدت هذا( على تغيير الكالون).

أما الدكتور الثاني: بعد عمل التحاليل والاشاعات نفي تماما كلام الدكتور الأول وقال لزوجي : مراتك كويسة وسليمة ومفيش حاجة اسمها رحم يتشال وامامها فرصة حمل طبيعي عادية جدا .

أما الدكتور الثالث : اكد على كلام الدكتور الثاني.

• انا الآن مطرودة من شقتي ( لم يستمر زواجنا أكثر من 4 شهور وكل متعلاقاتي وحياتي في المنزل).
•
• حاليا الموقف القانوني من جانبه هو:
* رافع عليا قضية بطلان مع اتهامي باقذر الاتهامات
• ومن جانبي انا:
* قضية نفقة
* قضية تمكين للشقة
* قضية الشروع في سرقة لوجود اخوية داخل الشقة في محاولة منهم لتنزيل محتويات شقة الزوجية.

• وذهب هو الى المجلس الاكلريكي وفتح ملف وتم استدعائي للعرض على طبيبة المجلس وبالفعل ذهبت والدكتورة قالت ان الورم الليفي لا يمنع ولا يوثر على الحمل.

والموقف في الكاتدرائية حاليا ان ابونا اللي معاه موضوعنا بلغ زوجي ان هو والملف هيتعرضوا على الاسقف المسئول

انا بجد مش عارفة اعمل اية حياتي باظت وكل حاجة ضاعت وخسرنا بعض انا وهو
وماماته واخواتة الله يسامحهم.

انا عايزة اعرف انا غلاطانة في القواضي دي ولا اية

وكل محاولات الصلح الودية، يرهنها هو بتنازلي عن كل القضايا

نفسي تشاركوني في برأيكم في مشكلتي

وأعمل ايه مع زوج هدم بيته ويتساوم في اعاده بناءه

واشكركم