حلم بالسفر

حلم بالسفر

"قبل ما تحلم فوق، احلم وأنت فايق، قبل ما تطلع فوق، انزل للحقايق"…دي مش مجرد كلمات شعر في أغنية، دي بداية كلامنا عن حلم كتير مننا بيحلم بيه، حلم الهجرة لبلاد العم سام (أمريكا يعني)، أو حتى أي عم تاني، فلوسه كتيرة وقيمتها أعلى من الجنيه المأسوف عليه. الحلم مش غريب علينا، ولو فكرنا بشكل واقعي في الأسباب اللي بتخلينا كشباب نفكر في السفر و الهجرة، ونسيب كل اللي لينا في مصر، مش ممكن نغلب، الأسباب مفيش أكثر منها، وأهمها الأسباب الاقتصادية.

لكن مهم لو بتفكر في الهجرة، إنك تحسبها صح، وتبص للموضوع من أكثر من زاوية. هل أنت حاولت بكل طاقتك إنك تنجح في مصر، ولقيت مفيش فايدة؟ خد بالك: معايير النجاح متشابهة جداً في كل العالم، يعني لو أنت مش بتاع شغل، غالباً الوضع مش هيختلف كتير بره مصر. فكرت إيه اللي ممكن تخسره في العيشة بعيد عن أهلك!؟ هل أنت مقدر قيمة علاقاتك بأهلك و أصحابك بالنسبة ليك كإنسان، ربنا خلقه كائن اجتماعي ميقدرشي ييعيش من غير ناس متقاربين معاه‼؟ فكرت إنك ممكن في جريك ورى الدولار، تخسر اللي أغلى منه‼ تخسر نفسك؟ تفتكر ممكن تكبش الفلوس من غير ما تدفع الحساب‼ فاكر كلام الإنجيل عن اللي حبهم للمال، خلاهم يطعنوا أنفسهم بأوجاع كثيرة (1تي 10:6) (تشبيه صعب، مش كده‼؟)… فكر معايا في حساب المكسب والخسارة. وفي النهاية اتمنالك تبقى تحسبها صح وتطلع كسبان، كسبان مش بس فلوس، لكن كسبان نفسك وأنت في خطة الله ليك.