جعل الكل حسنا في وقته

جعل الكل حسنا في وقته


لو عندك 86400 جنية كل يوم بيضافوا لحسابك هدية من غير مقابل، هاتعمل ايه بيهم ؟ بشرط انه ما فيش تحويش لليوم اللي بعديه و لازم تصرفهم حالاً.




هو ده نفس السؤال لكل يوم بيعدي من حياتك ، في كل يوم بتاخد 86400 ثانية هدية ما ينفعش تحوّلهم ليوم تاني، لكن ينفع تستثّمرهم لحاجات تنفع لبكرة. الكل متساوي في عطية الوقت ، أغنى واحد في العالم عنده نفس ال 86400 ثانية اللي عند أفقر واحد. السؤال المهم يا ترى كل واحد منهم بيقرر يعمل إيه في كل ثانية بياخدها في يوم جديد؟



في سفر الجامعة بيقول لكل أمر تحت السماء وقت، وجعل الكل حسنا في وقته ، المهم ها تعمل إيه في الوقت اللي ربنا بيدهولك كل يوم لأن في يوم من الايام ربنا هايوقّف الهدية ديه.



هاسيب معاك 5 نصائح لو عايز تستهلك هدية الوقت من غير أي استثمار، يعني لو عايز تضيع وقتك:

1. إعمل انشطة من غير أي هدف: ابتدي في حاجات من غير ما تعرف نتيجتها هاتكون أيه.

2. إعمل الحاجات المستعجلة: أي حاجة تظهر قدامك مستعجلة إعملها و ما تبصش على الحاجات المهمة

3. النوم من غير حساب: مش لازم تعرف هاتنام إمتى و تصحى إمتى. النوم مش بيأثر في اليوم

4. إعمل الحاجة كلها مرة واحدة: لما تبتدي في أي حاجة لازم تخلص في نفس الوقت مهما كان حجمها و لو حاجة مهمة طولت سيبها و مش لازم تتعمل لأنها صعبة.

5. وقّف في نص الحاجة: لما تعمل حاجة طويلة وقف في نصها ( لو بتقرا كتاب وقف في نصف الفصل من غير ما تخلصه)



اخر حاجة لازم نتأكد ان ربنا عمل كل حاجة حلوة لكن في وقتها ، و السؤال ليك هاتقرر تعمل إيه في هديتك؟





ياريت تقول إيه رأيك فى الحاجات اللى بتضيع وقتنا، وإزاى نستغل الوقت أفضل إستغلال، وتعرف رأى الآخرين وتتناقش معاهم