حياتى كده ؟؟

انا مليش اخوات و شايف انى مش اجتماعى خالص مع انى على النت بتكلم و اهزر لكن فى الواقع بلاقى نفسى مش عارف اتكلم وحتى لما اتكلم مع حد مببقاش عارف اركز بعينى معاه , اهتميت كتير بدراستى و الحمد لله تفوقت فيها جدا وكان عندى امل ان ده يقربنى من الناس اكتر لكن بلاقى نفسى ابعد اكتر عن الناس يمكن علشان بلاقى كتير عايزين يعرفونى علشان مصلحه بس
فى ناس كتير بتفتكرنى مغرور لكن الحقيقه انى مش عارف اقرب و اندمج مع الناس
و مع الاقراب بكون ساكت بردو و مش بتكلم مع ان زمان و انا صغير كانو بيقولو عليا شقى اوى

وحاله البعد عن الناس دى بدات معايا لوحدها من اولى ثانوى وكل سنه بتزيد اكتر عن الى قبلها ودلوقتى فى رابعه كليه زادت معايا جدا وبفضل ديما اقعد لوحدى ولو اتكلمت مع حد مبعرفش اتكلم غير عن الدراسه و لو كلمنى اى صديق فى اى موضوع بكلمه على اد الموضع

مش عارف ليه انا كده
يمكن علشان مليش اخوات , و مكان سكنا بعيد شويه عن اقاربنا فمش بنشفهم الا فى الاعياد , والجيران كل واحد فى حاله

قرئت مواضيع كتير فى التنميه البشريه لكن مجبتش معايا نتيجه
انا الحمد لله ناجح فى الحياه العلميه جدا لكن فى العلاقات مع الناس مش ناجح خالص وده بقى ياثر على مذكرتى و حياتى العلميه و بقيت حاسس ان كل الى بعمله ملهوش اى لازمه

يارب مكنش طولت عليكم , انا عايز اتكلم كتير بس مش عايز اكبر الموضوع